Kūvān

Majeed Amjad

Kūvān chal rahā hai! Magar khet sukhe paṛe heiṉ — nā fasleiṉ, nā khirman, nā dānā, nā shākhon kī bāheiṉ, nā phulon ke mukhṛe, nā kalīyon ke māthe, nā ruth kī javānī guzartā hai, kyāron ke pyāse kināron ko yūn chīr ta tez khūn rang pānī ke jis tara zakhmon kī dukhtī tapaktī tehon mein kisī neshtar kī ravanī

Idhar dhīrī dhīrī
Kūveiṉ kī nafīrī

Hai cheṛe chalī jā rahī aik tarānā

Purasrār gānā

Jise sun kar raqsān hai andhe, thake hāre, bejān bailon kā joṛā bichārā
Girāṉ bār zanjīreṉ, bhārī salāsil, kaṛakte hūe ātishen tāzyāne
Tavīl aur lāmuntahī rāste par bichā rakhe heiṉ dām apne qazā ne
Idhar vo musībat ke sāthī milāe hūe sīngon se sīng, shānon se shāne

Ravan heiṉ nā jāne
Kidhar? Kis ṭhikāne?

Nā rukne kī tāb aur nā chalne kā yārā

Muqadar nayārā

Kūveiṉ vālā, gādī pe leṭā hai mast apnī bansī kī mīṭhī surīlī sadā mein
Kahīn khet sūkhā paṛā reh gayā aur nā us tak kabī āī pānī kī bārī
Kahīn beh geiṉ aik hī tundrīle kī fayāz lehron mein kiyārī ki kiyārī
Kahīn ho geiṉ dhūl mein dhūl lākhon, rangā rang faslein, samardār sārī

Pareshān pareshān,
Gurīzān Gurīzān,

Taṛaptī heiṉ khusbūen dām havā mein

Nizām-e-fanā mein

Aur aik naghmā sarmadī kān mein ā rahā heiṉ, musalsal kūvān chal rahā heiṉ
Piyā pe magar narm rū is kī raftār, peham magar be-tukān is kī gardish
Adam se azal tak, azal se abad tak, badaltī nahī aik ān is kī gardish
Nā jāne līye apne dolāb kī āstīnon mein kitne jahān is kī gardish

Ravān he ravān
Tapān he tapān

Ye chakar yun he jāwidān chal rahā hai

Kūvān chal rahā hai